So di people dem dung a di embassi gi mi di visa
Mi pack up mi bag dem fi lef Jamaica
mi did ago tell all a mi fren dem lata
But nuff neva waah mi get tru
cho so mi nuh caita
Suh wen fi go a airport mi lef before time
Leave mi yaard from five wen di papa seh nine
Look roun di place an a me alone inna di line
Farin a fi me one "Oh wat a sign!
Mi reach pon di plane
All weh deh pon mi brain
Fi get mi nice food
And a glass a champagne
Suh di waitress
No di stewardis
Cum up to me an ask
"Peanut or chips?"
Mi kiss mi teet
An ask a wah dis?
But di way mi did vex
Mi jus eat it!
Plane ride Bumpy dou
It feel like a pot ole
Out a door look nice
But inna di place cole
Mi battam start hurt mi
Mi sidung too long
Hurry up nuh plane
Caah wait fi reach man!!
Di plane lan now
An everybody clap
Finally reach a farin
Yaaad mi naah go back
Guh tru immigration now
A nice car mi fada drive
Frighten fi si dis farin
A out a door mi head a ride
Suh mi reach inna di house
An start fi look a roun
This liikle like its a place fi a mouse
Mi neva know ppl live anda groun
First day out pan di street
We decide fi tour di city
Dem say train deh undaneet
But da place ya smell bad
It nuh pretty
Mi si di train a come fass
Fi it stop mi start fi fan
Nuhbody else naah do a ting
A jus me one
Mi si people a beg
My gosh dis cant be right
The only ting weh mek mi day bout America suh far
A di big buildings and di pretty pretty lights
Two years pass now
No money fi spend
Did hav a big house a yaaad
Now mi affi pay rent
Nuttin like mi expect
Yuh all get di gis
Mi cum up yah come ask miself
Farin.... A Wah Dis???
No comments:
Post a Comment